Tape Tawado Aakaro

तपे तावड़ो आकरो

तपे तावड़ो आकरो, तालरिया में ठाठ

समदां उफणी बादळी , खेतां मुळकियो जाट

तपियो आकरो जेठ जद भीग्यो हो आषाढ़

हळियो धरियो कांधै पर खेतां चालियो जाट

उत्तर दिशा री बादळी नाँखे मोटी छांट

मोती बरस्या आंगणे राजी हुयो जाट

उगियो धान खेत में धरती खोलिया कपाट

लूरां लैवे जाटणी , तेजो गावे जाट

मैणत मीठी मतवाळी , गावे चारण भाट

आशीष देवे आंतरा , जुग जुग जीये जाट

नीं होवे सिर फोड़िया सोलह दूणी आठ

बुद्धि है बत्तीस गुणा, कर दिखावे जाट

मेड़ी बैठी जाटणी , खेत बिचाळै खाट

कण कण रमै रामजी जद हळियो खड़े जाट

घी घाले जद जाटणी , मीठी लागे घाट

खाता खायी जीभड़ी , भरपेट जीमै जाट

धरती थारो काळजो, है शंकर रो ललाट

थारी लाज राखण नै महादेव बणाया जाट